Servizos á Comunidade Universitaria

ÁREA DE ARQUITECTURA E URBANISMO

LOCALIZACIÓN:
– SANTIAGO: Casa Vivenda dos Funcionarios 6, 2º andar, Avenida das Ciencias.
– LUGO: Facultade de Veterinaria, Avenida Carballo Calero.

FINALIDADE:
A Área de Arquitectura e Urbanismo atende as necesidades de reforma, ampliación e mellora da infraestrutura edificada nos Campus de Santiago de Compostela e Lugo —ademais de varios edificios vinculados á investigación noutros puntos de Galicia—, comprendida por máis de 100 edificios que abranguen unha superficie construída de máis de 550.000 m², sobre unha superficie urbanizada de máis de 850.000 m². Encárgase tamén da coordinación e dirección das obras de nova planta, así como da xestión do planeamento que atinxe á Universidade.

ÁREA DE CALIDADE E MELLORA DOS PROCEDEMENTOS

LOCALIZACIÓN:
– SANTIAGO: Colexio San Xerome, Praza do Obradoiro.

FINALIDADE:
O Servizo de Calidade é un servizo que coordina e apoia tecnicamente os procesos de avaliación, certificación e acreditación; deseña e pon en marcha os plans de calidade na USC; dinamiza e impulsa o sistema de xestión de calidade da Universidade, analiza os procedementos e formula propostas de mellora a través do redeseño dos procesos ou a reorganización dos servizos.

ÁREA DE CULTURA

LOCALIZACIÓN:
– SANTIAGO: Colexio San Xerome, Praza do Obradoiro.
– LUGO: Edificio Intercentros, Rúa Bernardino Pardo.

FINALIDADE:
A Área de Cultura ofrece distintas programacións, prestacións e servizos de carácter cultural aos membros da comunidade universitaria e á sociedade en xeral. As liñas de actuación son: a promoción cultural, con accións de apoio para a realización de actividades e producións e axudas a teatro e danza; a produción cultural, mediante actividades estables da Aula de Teatro, a Orquestra Sinfónica da USC, o Espazo de Danza e o Coro Universitario; a formación e extensión cultural, coa oferta de cursos de arte dramática, danza e fotografía, a Universidade de Verán, o programa de Astronomía ou os Encontros Orquestrais; a difusión cultural, coa organización de concertos, exposicións, representacións escénicas, proxeccións cinematográficas e outras actividades culturais; e a promoción, valorización e conservación do patrimonio histórico-artístico da USC.

ÁREA DE OPERACIÓN DE INFRAESTRUTURAS

LOCALIZACIÓN:
– SANTIAGO: Vivendas dos Funcionarios, Avenida das Ciencias.

FINALIDADE:
A Área de Operación de Infraestruturas ocúpase das actividades necesarias para asegurar o funcionamento das infraestruturas físicas da USC, agás das redes de telecomunicacións. Está composta pola Unidade de Mantemento e Seguridade dos edificios existentes e pola Unidade de Enerxía e Sustentabilidade.

ÁREA DE ORIENTACIÓN LABORAL E EMPREGO

LOCALIZACIÓN:
– SANTIAGO: Pavillón Estudantes 1º andar, Rúa Lope Gómez de Marzoa.

FINALIDADE:
A misión da Área de Orientación Laboral e Emprego é desenvolver accións de información, formación e orientación laboral coa finalidade de mellorar as opcións de ocupabilidade e o proceso de integración laboral do estudantado e das persoas tituladas, ademais de facilitar a transición do sistema educativo á vida laboral.

ÁREA DE TECNOLOXÍA DA INFORMACIÓN E DA COMUNICACIÓN (ATIC)

LOCALIZACIÓN:
– Pavillón de Servizos, Rúa Xosé María Suarez Nuñez.

FINALIDADE:
As tecnoloxías da información e da comunicación son un instrumento básico sen as que non é posible desenvolver unha universidade moderna e emprendedora. A investigación, a docencia e a xestión non poden acadar os compromisos de calidade sen unha utilización eficiente e intensiva das TIC.

ÁREA DEPORTIVA

LOCALIZACIÓN:
– SANTIAGO: Avenida das Burgas.
– LUGO: Edificio Intercentros, Rúa Bernardino Pardo.

FINALIDADE:
A Área Deportiva da USC encárgase de planificar e xestionar as actividades e instalacións deportivas da USC co obxectivo de promover unha acción deportiva integral, saudable, diversa e para todas as persoas, co máximo respecto polo noso medio ambiente e a nosa cultura e de estimular a participación nas actividades físico-deportivas de todos os membros da comunidade universitaria e da cidadanía en xeral, incidindo en políticas de igualdade para as persoas e colectivos de menor práctica deportiva.

CENTRO DE FORMACIÓN DE PERSOAL

LOCALIZACIÓN:
– SANTIAGO: Vivenda dos Funcionarios 7 2º andar, Avenida das Ciencias.

FINALIDADE:
O Centro de Formación de Persoal ten como misión planificar, deseñar, executar e avaliar políticas formativas destinadas ao persoal da USC (PTXAS, PDI e PI) que estean aliñadas cos obxectivos e liñas estratéxicas aprobadas pola USC, que respondan ás necesidades formativas detectadas e que se orienten ao desenvolvemento profesional, como peza esencial para o cambio e a mellora da docencia, da investigación, da xestión e dos servizos que presta a USC.
Oferta os programas formativos para o persoal e mais a formación en idiomas do Centro de Linguas Modernas; impulsa a posta en marcha de proxectos innovadores que contribúan á mellora da docencia, e dá apoio ao uso do Campus Virtual e doutras tecnoloxías para a docencia.

CENTRO DE LINGUAS MODERNAS

LOCALIZACIÓN:
– SANTIAGO: Casa dos Catedráticos, Avenida das Ciencias, 7.
– LUGO: Aulario Lugo, Facultade de Humanidades, Complexo docente; Edificio Intercentros, Rúa Bernardino Pardo.

FINALIDADE:
O Centro de Linguas Modernas é o centro da USC que organiza, xestiona e imparte os cursos de linguas propias e estranxeiras e convoca, organiza e realiza as probas de lingua, tanto da USC como as de exames oficiais de centros internacionais como o Instituto Cervantes, o Goethe-Institut, a Università per Stranieri de Siena (CILS) ou entidades semellantes. O CLM impulsa asemade actividades para divulgar as linguas modernas e as súas culturas.

ESCOLA INFANTIL BREOGÁN

LOCALIZACIÓN:
– SANTIAGO:
· ESCOLA: Avenida de Vigo.
· ADMINISTRACIÓN: Pavillón Estudantil, Rúa Lope Gómez de Marzoa.

FINALIDADE:
A Escola Infantil Breogán (EIB) é un servizo educativo que ofrece a USC a toda a comunidade universitaria no seu compromiso social coa conciliación da vida laboral, persoal e familiar. Dirixe a súa actividade a nenos e nenas de 0–3 anos; a súa liña pedagóxica está baseada, principalmente, na afectividade, na observación, na experimentación e no xogo a través dun proxecto educativo global e integral.

GABINETE DE COMUNICACIÓN

LOCALIZACIÓN:
– SANTIAGO: Pazo de San Xerome, Praza do Obradoiro.

FINALIDADE:
Encárgase de difundir aos medios de comunicación todas as actividades e proxectos científicos, académicos, culturais e institucionais da USC e atende as consultas e demandas de información dos propios medios. Do mesmo xeito achega asesoramento á comunidade universitaria en relación á difusión de eventos ou novas de actualidade. As súas funcións abranguen en tres grandes áreas: comunicación interna, comunicación externa e comunicación institucional. Ocúpase da elaboración e publicación diaria do xornal dixital da USC e a xestión das redes sociais propias da USC.

IMPRENTA UNIVERSITARIA

LOCALIZACIÓN:
– SANTIAGO: Pavillón de servizos, Rúa Xosé María Suarez Nuñez.

FINALIDADE:
Servizo dedicado ao deseño, maquetación e impresión de toda a papelería oficial da USC (impresos, sobres, carteis, folletos, libros…) e mais a venda de todo tipo de material de oficina e consumibles de informática.

OFICINA DE CAPTACIÓN INTERNACIONAL

LOCALIZACIÓN:
– SANTIAGO: Pavillón Estudiantil, Rúa Lope Gómez de Marzoa.

FINALIDADE:
A Oficina de Captación Internacional coordina as estratexias para a identificación de oportunidades relacionadas coa internacionalización da universidade e o fomento do interese de estudantes internacionais en estudar na USC. En particular céntrase en desenvolver novas iniciativas e programas e na difusión da oferta académica da USC e a súa imaxe internacional a través de accións de promoción e representación internacional.

Por outra banda, ofrece asistencia na atención e acollida aos/ás estudantes visitantes de universidades estranxeiras (free-mover) e estudantes internacionais con matrícula en programas oficiais da USC, así como ao persoal docente e investigador internacional, neste caso a través do Centro Galego de Mobilidade de Investigadores da Rede Europea EURAXESS, que se integra dentro da Oficina.

OFICINA DE DESENVOLVEMENTO SOSTIBLE

LOCALIZACIÓN:
– SANTIAGO: Casa da Balconada, Rúa Nova 6.

FINALIDADE:
A Oficina de Desenvolvemento Sostible é o servizo encargado de deseñar e desenvolver o Plan de Desenvolvemento Sostible (PDS) da USC e impulsar as políticas de sostibilidade na xestión, investigación, formación e a extensión universitaria, xerar novos coñecementos e promover a educación ambiental, desenvolver programas de ecoloxía interna e realizar campañas de sensibilización e participación social aliñadas co PDS e os obxectivos da Axenda 2030.

OFICINA DE IGUALDADE DE XÉNERO

LOCALIZACIÓN:
– SANTIAGO: Pavillón Estudantil, Rúa Lope Gómez de Marzoa.

FINALIDADE:
A Oficina de Igualdade de Xénero ten como misión fundamental facer efectivo o compromiso da USC coa sociedade na consecución da igualdade real entre homes e mulleres, asumindo os principios de dignidade humana con independencia do sexo das persoas, e a igualdade e equidade de xénero como elementos fundamentais da actividade universitaria.

A OIX coordina a elaboración e execución do plan de igualdade da USC; impulsa iniciativas para desenvolver a cultura da igualdade e introducir a perspectiva de xénero nos distintos sectores do coñecemento; favorece a información, formación e investigación específicas en estudios de xénero; activa políticas de conciliación da vida laboral coa persoal e familiar de todas as traballadoras e traballadores da Universidade; e detectar e actúa como mediadora nos casos de conflitos por razón de xénero na docencia e as relacións laborais.

OFICINA DE INFORMACIÓN UNIVERSITARIA

LOCALIZACIÓN:
– SANTIAGO: Pavillón Estudantil, Rúa Lope Gómez de Marzoa.
– LUGO: Edificio Intercentros, Rúa Bernardino Pardo.

FINALIDADE:
A Oficina de Información Universitaria, con presenza no Campus de Santiago e no Campus de Lugo, é o Servizo que canaliza as demandas informativas relativas a cuestións de carácter xeral sobre a organización, funcionamento e actividades da USC, tanto para o alumnado coma para o resto da comunidade universitaria e público en xeral. Para o seu labor de apoio ao alumnado nas distintas etapas do seu percorrido na USC, conta con atención presencial na propia oficina, atención telefónica e por correo electrónico, accións que se complementan coa participación en diferente tipos de eventos educativos.

OFICINA DE MOBILIDADE

LOCALIZACIÓN:
– SANTIAGO: Pavillón Estudantil, Rúa Lope Gómez de Marzoa.
– LUGO: Edificio Intercentros, Rúa Bernardino Pardo.

FINALIDADE:
A Oficina de Mobilidade ten por misión a coordinación e xestión administrativa dos distintos programas de intercambio académico nos que participa a USC (Erasmus+, convenio bilateral, SICUE…). En cooperación cos distintos centros, a Oficina de Mobilidade contribúe á internacionalización da comunidade universitaria, ofrecendo oportunidades de desenvolvemento académico e profesional ao alumnado, PDI e PAS.

Entre as principais tarefas da oficina están a redacción, publicación e resolución de convocatorias dirixidas á comunidade universitaria da USC, o control e seguimento das mobilidades e a solicitude e xustificación de fondos, así como a atención ao estudantado e persoal procedente de universidades socias.

OFICINA DE PROXECCIÓN INTERNACIONAL

LOCALIZACIÓN:
– SANTIAGO: Pavillón Estudantil, Rúa Lope Gómez de Marzoa.

FINALIDADE:
A Oficina de Proxección Internacional coordina a actividade de proxección exterior da USC garantindo a súa articulación coa misión e xestión institucional. Entre as súas funcións inclúense a identificación de prioridades estratéxicas no eido da internacionalización e a promoción de convenios e relacións de colaboración con organismos e institucións de educación superior internacionais, así como a participación en alianzas, redes, asociacións e foros educativos estratéxicos a nivel mundial.

A Oficina de Proxección Internacional asume, asemade, entre as súas tarefas a visibilización e posta en valor das estruturas e recursos de internacionalización da USC, asegurando o seu uso e aproveitamento interno así como o seu impacto no marco da súa estratexia de configuración dun perfil internacional.

Esta Oficina presta ademais soporte na planificación, así como na xestión das relacións institucionais con universidades estranxeiras.

OFICINA WEB

LOCALIZACIÓN:
– SANTIAGO: Pazo de Fonseca, Rúa do Franco.

FINALIDADE:
A Oficina web dinamiza e coordina a información e a comunicación da USC a través da súa web institucional e ocúpase do mantemento, elaboración e actualización da información académica e administrativa e presta apoio á xestión de contidos dos diferentes centros, departamentos e unidades de xestión da USC.

PARQUE MÓBIL

LOCALIZACIÓN:
– SANTIAGO: Colexio San Xerome, Praza do Obradoiro.

FINALIDADE:
O Servizo do Parque Móbil asegura o transporte dos cargos de representación da USC e mais dos servizos ordinarios de mobilidade para garantir o normal funcionamento doutros servizos universitarios.

SERVIZO DE CORREOS

LOCALIZACIÓN:
– SANTIAGO: Pazo de Fonseca, Rúa do Franco.

FINALIDADE:
O Servizo de Correos actúa como intermediario entre a USC é os operadores postais e ocúpase da recollida e distribución do correo entre os seus centros e servizos e do establecemento das rutas e os horarios para recollido e distribución polos diferentes centros e instalacións universitarias.

SERVIZO DE NORMALIZACIÓN LINGÜÍSTICA

LOCALIZACIÓN:
– SANTIAGO: Vivendas dos Funcionarios, Avenida das Ciencias.
– LUGO: Edificio Intercentros, Rúa Bernardino Pardo.

FINALIDADE:
O Servizo de Normalización Lingüística ten como misión promover e apoiar tecnicamente o proceso de extensión da lingua galega na Universidade de Santiago de Compostela. Para iso, deseña e desenvolve actividades, crea e difunde materiais, asesora en asuntos lingüísticos e planifica actividades formativas que poidan axudar a que os distintos membros da comunidade universitaria incorporen e manteñan o galego como lingua.

SERVIZO DE PARTICIPACIÓN E INCLUSIÓN UNIVERSITARIA

LOCALIZACIÓN:
– SANTIAGO: Pavillón Estudantil, Rúa Lope Gómez de Marzoa.
– LUGO: Edificio Intercentros, Rúa Bernardino Pardo.

FINALIDADE:
O Servizo de Participación e Inclusión Universitaria (SEPIU) coordina a oferta de actividades de voluntariado, participación e inclusión universitaria coas que se favorece a formación integral do alumnado desde unha visión socialmente responsable e comprometida cos obxectivos do desenvolvemento sostible.

SERVIZO DE PREVENCIÓN DE RISCOS

LOCALIZACIÓN:
– SANTIAGO: Vivenda dos Funcionarios, Avenida das Ciencias.

FINALIDADE:
O Servizo promove a saúde e seguridade dos traballadores da USC e para iso deseña, aplica e coordina os plans e programas de actuación preventiva, avalía os factores de risco que poidan afectar á seguridade e saúde do persoal, e promove a información e implicación de todos na cultura preventiva.

SERVIZO DE PROTECCIÓN RADIOLÓXICA

LOCALIZACIÓN:
– SANTIAGO: Facultade de Farmacia, Avenida de Vigo.

FINALIDADE:
A misión do servizo é reducir os riscos derivados da utilización das radiacións ionizantes na USC dando cumprimento aos requisitos de seguridade e protección esixidos polas Administracións.

SERVIZO DE VIXILANCIA DA SAÚDE

LOCALIZACIÓN:
– SANTIAGO: Vivendas dos Funcionarios, Avenida das Ciencias.
– LUGO: Edificio Intercentros, Rúa Bernardino Pardo.

FINALIDADE:
O servizo coordina e impulsa accións de vixilancia da saúde (campañas informativas e de sensibilización), realiza os recoñecementos médicos de empresa e o seu seguimento e control coas probas analíticas precisas. Atende asemade consultas por enfermidade común ou consultas urxentes dos traballadores da USC, ademais de prestar primeiros auxilios.

SERVIZO UNIVERSITARIO DE RESIDENCIAS

LOCALIZACIÓN:
– SANTIAGO: Pavillón Estudantil, Rúa Lope Gómez de Marzoa.

FINALIDADE:
O Servizo Universitario de Residencias (SUR) proporciona aloxamento ao alumnado e a outros colectivos universitarios a través dunha rede propia de Residencias e Colexios Maiores nos seus campus co obxectivo de permitir unha mellor integración, formación e igualdade de oportunidades no ámbito universitario. Ademais, o SUR tamén contribúe ao desenvolvemento e difusión de actividades culturais, científicas, artísticas ou deportivas, poñendo as súas dependencias a disposición das entidades organizadoras e facilita a xestión do aloxamento dos participantes en congresos da USC.

UNIDADE DE ATENCIÓN PSICOLÓXICA

LOCALIZACIÓN:
– SANTIAGO: Pavillón Estudantil, Rúa Lope Gómez de Marzoa.

FINALIDADE:
A Unidade de Atención Psicolóxica está dirixida a prestar atención psicolóxica aos/ás estudantes matriculados na USC nos graos, másters e doutoramento que presentan problemas psicolóxicos que interfiren co seu rendemento académico.

Administración

CENTRO DE DATOS E PROCESOS

LOCALIZACIÓN:
– SANTIAGO: Casa da Balconada, Rúa Nova.

FINALIDADE:
Poñer en valor os datos da USC como activo da organización para a toma de decisións, identificando procesos ineficaces e achegando solucións para optimizar o seu funcionamento. Xera os informes, indicadores e cadros de mando que son necesarios para a xestión, a toma de decisións e o cumprimento do compromiso de rendición de contas coa sociedade e a mellora constante dos procesos da USC.

O mantemento da USC en Cifras; a subministración de datos a unidades propias e entidades alleas (administracións públicas, rankings universitarios…); o apoio na analítica de datos ao sistema de garantía de calidade; o mantemento do catálogo de procedementos da Sede Electrónica; e a resposta as demandas sociais de responsabilidade, transparencia e información pública, son algunhas das tarefas do Centro, que tamén xestiona a nivel operacional o sistema institucional de enquisas.

OFICINA DE ANÁLISE DE RECLAMACIÓNS

LOCALIZACIÓN:
– SANTIAGO: Colexio de San Xerome, Praza do Obradoiro.

FINALIDADE:
A Oficina de Análise de Reclamacións (OAR) é a unidade administrativa encargada da tramitación de recursos administrativos en materia de xestión académica; e mais de tramites as queixas e suxestións que presente o estudantado ou as persoas usuarias relativas ao funcionamento dos servizos docentes, administrativos e de apoio da USC.

SERVIZO DE ASESORÍA XURÍDICA

LOCALIZACIÓN:
– SANTIAGO: Colexio de San Xerome, Praza do Obradoiro.

FINALIDADE:
O Gabinete de Asesoría Xurídica é unha unidade de asesoramento dos órganos de goberno da USC e de apoio aos restantes órganos e unidades da Universidade e os seus Centros, e encárgase da representación e defensa da institución perante os Xulgados e Tribunais.

SERVIZOS DE AXUDAS E SERVIZOS AO ALUMNADO

LOCALIZACIÓN:
– SANTIAGO: Pavillón Estudantil, Rúa Lope Gómez de Marzoa.

FINALIDADE:
O Servizo ocúpase da información e xestión das bolsas e axudas ao alumnado de Grao e Máster, da xestión das axudas ás asociacións de estudantes, da oferta de aloxamento universitario nas residencias e colexios maiores (Servizo Universitario de Residencias), e das actuacións a prol da conciliación da vida laboral coa persoal e familiar a través da Escola Infantil Breogán.

SERVIZO DE CONTRATACIÓN E PATRIMONIO

LOCALIZACIÓN:
– SANTIAGO: Casa da Balconada, Rúa Nova.

FINALIDADE:
O Servizo de Contratación e Patrimonio é a unidade administrativa responsable de coordinar, xestionar e dar seguimento aos procedementos de contratación, ademais de ocuparse da xestión patrimonial e de achegar asesoramento e a información necesaria para a toma de decisións en materia económica. Do Servizo depende tamén a xestión dos asuntos económicos dos centros de gasto con sede no Pazo de San Xerome e na Casa da Balconada.

O Servizo ten dúas seccións: a Sección de Xestión e Contratación e a Sección de Patrimonio. Xestión e Contratación ocúpase da tramitación e seguimento de toda a contratación administrativa da USC. Patrimonio é competente na xestión patrimonial dos bens mobles e inmobles da USC; na elaboración, actualización e seguimento do inventario xeral e mais a xestión dos expedientes de cesións e doazóns de bens, así como na xestión de incidencias relativas aos contratos de seguros.

SERVIZO DE CONTROL INTERNO

LOCALIZACIÓN:
– SANTIAGO: Casa da Balconada, Rúa Nova.

FINALIDADE:
O Servizo de Control Interno é responsable da verificación do cumprimento de requirimentos contables, orzamentarios e legais da USC co obxectivo de atinxir a maior eficiencia e eficacia no uso dos recursos xestionados e contribuír á mellor toma de decisións e ao impulso de iniciativa de melloras da administración universitaria.

O Servizo de Control Interno asegura o cumprimento das normas e procedementos de xestión contable e orzamentaria; deseña procedementos de control e coordina a súa implantación; controla o cumprimento da legalidade; colabora na elaboración do orzamento asumindo tarefas de coordinación da información; coordina a implantación de novas ferramentas vinculadas á xestión contable e orzamentaria; colabora na implantación da contabilidade de custes; dá soporte ás auditorías externas e supervisa a contratación administrativa.

SERVIZO DE ORZAMENTACIÓN E PLANIFICACIÓN

LOCALIZACIÓN:
– SANTIAGO: Casa da Balconada, Rúa Nova.

FINALIDADE:
O servizo ocúpase da planificación e da orzamentación da USC, así como do seguimento da súa execución e do análise do resultado da súa actividade a través da contabilidade analítica. A actividade do servizo concrétase a través dos seguintes descritores:

Seguimento da execución do Plan Galego de Financiamento Universitario e outros instrumentos de financiamento (convocatorias competitivas, convenios…).
Seguimento do financiamento afectado en relación á execución das actividades financiadas.
Seguimento da execución do orzamento e a súa proxección, tanto en gastos, como en dereitos e tesourería.
Análise do resultado de actividade e dos indicadores de xestión e elaboración do informe de contabilidade analítica a incluír nas Contas Xerais da universidade.
Establecemento de tarifas por prestación de servizos.
Definición da estrutura de programas que permita un correcto seguimento da actividade da universidade, así como o mantemento do resto de codificación económica.

Estas competencias desenvolveranse en coordinación coa Subárea de Contabilidade.

SERVIZO DE PLANIFICACIÓN DE PDI

LOCALIZACIÓN:
– SANTIAGO: Colexio de San Xerome, Praza do Obradoiro.

FINALIDADE:
O Servizo de Planificación de Persoal Docente e Investigador ten encomendadas a avaliación das necesidades de persoal docente e investigador, a elaboración e mantemento da relación de postos de traballo e a xestión integrada dos diferentes procedementos de selección e provisión de postos de persoal docente e investigador, tanto funcionario como contratado.

Asume tamén funcións de apoio e soporte técnico e administrativo ás comisións de selección e ás comisións de reclamacións e revisión. No ámbito da xestión ten atribuída a proposta de resolución en diversos aspectos relativos á vida laboral do profesorado. É competencia deste Servizo elaborar propostas de regulación, memorias e informes, xestionar a documentación de soporte aos órganos de goberno para a toma de decisións e, en xeral, subministrar a información pertinente a outras unidades e órganos internos e externos da USC e mais proporcionar apoio técnico á Vicerreitoría que dirixe a política de persoal docente e investigador.

SERVIZO DE XESTIÓN ACADÉMICA

LOCALIZACIÓN:
– SANTIAGO: Pavillón Estudantil, Rúa Lope Gómez de Marzoa.

FINALIDADE:
O Servizo de Xestión Académica ten como misión a realización das tarefas relacionadas con todos os procedementos administrativos derivados do estudo na USC para alumnos e outros usuarios.

SERVIZO DE XESTIÓN DA OFERTA E PROGRAMACIÓN ACADÉMICA (PXOPRA)

LOCALIZACIÓN:
– SANTIAGO: Colexio San Xerome, Praza do Obradoiro.

FINALIDADE:
O Servizo ten por misión servir de apoio ás estruturas académicas da USC para que estas configuren una oferta anual e integrada de estudos. A súa sección de Oferta e Programas de Estudo ocúpase dos procedementos de aprobación, modificación e renovación dos planos e programas de estudos oficiais e de colaborar na elaboración de informes sobre a demanda de estudos, a análise de resultados e o grao de satisfacción dos estudantes. A súa sección de Organización Académica xestiona os programas de organización docente dos departamentos e dos centros.

SERVIZO DE XESTIÓN DE PERSOAL

LOCALIZACIÓN:
– SANTIAGO: Casa da Balconada, Rúa Nova.

FINALIDADE:
O Servizo de Xestión de Persoal ocúpase da xestión e resolución das incidencias administrativas e económicas do persoal docente e investigador e do persoal de administración e servizos.

Atende os procedementos administrativos referidos á toma de posesión ou á formalización do contrato, altas en nómina e na Seguridade Social, recoñecemento de servizos previos, cambios de situacións laborais, expedientes de compatibilidades, prórroas e transformacións de contratos, cambios de categorías, permisos, licenzas, ou a extinción de relacións laborais, cesamentos, liquidacións, renuncias, xubilacións etc.

SUBÁREA DE CONTABILIDADE

LOCALIZACIÓN:
– SANTIAGO: Casa da Balconada, Rúa Nova.

FINALIDADE:
Na Subárea de Contabilidade rexístranse as diferentes fases de execución dos gastos, ingresos e operacións non orzamentarias, a conta anual de liquidación dos orzamentos e a memoria económica anual na parte correspondente á análise das contas do exercicio.

Efectúase, asemade, a xestión da tesourería da universidade —pagamentos e cobros—, a xestión de activos e pasivos financeiros e o rexistro de avais, así mesmo actúa coma xestora das contas de anticipos a xustificar dos servizos centrais da Universidade.

SUBÁREA DE PLANIFICACIÓN DE PAS

LOCALIZACIÓN:
– SANTIAGO: Casa da Balconada, Rúa Nova.

FINALIDADE:
A Subárea de Planificación de Persoal de Administración e Servizos é unha unidade de apoio técnico á Xerencia para o desenvolvemento da política de PAS, centrando a súa actividade fundamentalmente na planificación dos cadros de persoal, a provisión de postos e selección dos recursos humanos necesarios.

As súas funcións principais son a avaliación das necesidades de persoal, definición dos perfís dos postos, elaboración das propostas de cadros de persoal, elaboración das ofertas de emprego, xestión dos procesos de selección e de provisión de postos e, por último, funcións de apoio e soporte técnico e administrativo aos tribunais de selección e provisión de postos.

Asemade, é competencia da subárea a elaboración de propostas de regulamentación, informes, memorias ou estudos que sirvan de soporte aos órganos de goberno para a toma de decisións, así como facilitarlles a información aos órganos de representación da USC.

UNIDADE DE CONVENIOS

LOCALIZACIÓN:
– SANTIAGO: Pazo de Fonseca, Rúa do Franco.

FINALIDADE:
A Unidade de Convenios ten por misión a tramitación e rexistro dos convenios que estableza a Universidade con outras entidades, públicas e privadas.
As súas funcións principais son o asesoramento e información sobre o procedemento de tramitación e sinatura dos convenios; a recepción, revisión e tramitación das propostas de convenios; a presentación para aprobación dos convenios no Consello de Goberno; o rexistro, arquivo e difusión dos convenios unha vez asinados.

Apoio á Docencia e á Investigación

UNIDADE DE ANALISE INSTRUMENTAL

LOCALIZACIÓN:
- Lugo: Edificio de Apoio á Investigación (CACTUS). Campus de Lugo.

FINALIDADE:
A Unidade de Análise Instrumental conta con diversas técnicas analíticas entre as que destacan: Análise Elemental, Análise Térmica e gravimétrica, ICP-MS, ICP-OES, e Cromatografía iónica.

AREA DE INFRAESTRUTURAS DE INVESTIGACION

LOCALIZACIÓN:
- Santiago: Edificio de Apoio á Investigación (CACTUS). Rúa Constantino Candeira.

FINALIDADE:
A Área de Infraestruturas de Investigación é a estrutura organizativa, dependente da Vicerreitoría de Política Científica, que integra as infraestruturas instrumentais de uso común que prestan servizos de apoio á investigación na USC. O obxectivo funcional da Área de Infraestruturas de Investigación é dotar de maior unicidade e operatividade aos recursos de apoio á investigación da USC.

AREA DE VALORIZACION TRANSFERENCIA E EMPRENDEMENTO (AVTE)

LOCALIZACIÓN:
- Santiago: Vivendas dos funcionarios. Avenida das ciencias. - Lugo: Edificio CACTUS. Campus de Lugo.

FINALIDADE:
A Área de Valorización, Transferencia e Emprendemento (AVTE) é o servizo encargado da xestión integral do proceso de transferencia dos resultados de investigación e mais da difusión e a promoción da cultura emprendedora entre a comunidade universitaria. A AVTE identifica resultados con potencial comercial; xestiona as patentes para protexelos negocia e establece acordos de licenza e impulsa a creación de empresas baseadas en resultados de investigación.

ARQUIVO HISTORICO UNIVERSITARIO (AHUS)

LOCALIZACIÓN:
- Santiago: Casa Simeón. Rúa das Casas Reais.

FINALIDADE:
O Arquivo Histórico Universitario está constituído pola documentación administrativa e académica creada Universidade ao longo da súa historia, así como por fondos documentais non universitarios adquiridos, doados ou confiados en depósito á USC. O Arquivo Universitario estrutúrase en administrativo e histórico. Na súa condición de arquivo histórico constitúe unha unidade de apoio á investigación e á docencia e a súa misión é conservar, ordenar, clasificar e facilitar a consulta e uso da documentación.

BIBLIOTECA UNIVERSITARIA

LOCALIZACIÓN:
- Santiago: Rúa do Franco.

FINALIDADE:
A Biblioteca Universitaria ten a súa orixe na primitiva Librería da Universidade, creada a mediados do século XVI. A colección histórica da Biblioteca é o resultado da adquisición de fondos por parte da Universidade e das moi valiosas achegas bibliográficas recibidas ao longo da súa historia. Na actualidade, a Biblioteca Universitaria defínese como un centro de recursos para a docencia, a investigación, o estudo e a aprendizaxe. Está constituída por todos os fondos bibliográficos, documentais e audiovisuais adquiridos polos diferentes centros e servizos. Ofrece 20 puntos de atención nos campus de Santiago e Lugo.

CASA DE EUROPA

LOCALIZACIÓN:
- Santiago: Parque de Vista Alegre. Rúa das Salvadas.

FINALIDADE:
A Casa de Europa é unha residencia universitaria destinada ao aloxamento de profesorado convidado e visitantes procedentes doutras universidades do mundo que acoden á Universidade de Santiago de Compostela para participar en actividades docentes e investigadoras.

CENTRO DE ESTUDOS E DOCUMETACION EUROPEA

LOCALIZACIÓN:
- Santiago: Facultade de Dereito. Rúa Dr. Ángel Echeverri

FINALIDADE:
O Centro de Estudos e Documentación Europeos (CEDE) da USC é un centro de xestión de coñecementos que actúa como mediador entre a Unión Europea (UE), a comunidade universitaria e a sociedade galega. Entre outras tarefas, o CEDE dá acceso a publicacións e documentos oficiais da UE; axuda a encontrar información sobre a historia, a estrutura, a lexislación e as políticas da UE; orienta sobre as oportunidades de traballo e de prácticas nas institucións comunitarias; e organiza actividades de divulgación e formación dirixidas á comunidade universitaria e á sociedade en xeral.

ESTACION BIOLOXICA MARIÑA DE A GRAÑA

LOCALIZACIÓN:
- Ferrol: A GRAÑA. Rúa da Ribeira.

FINALIDADE:
A Estación de Bioloxía Mariña da Graña é unha instalación científica creada para fomentar e facilitar a investigación e a docencia na bioloxía mariña e para prestar asesoramento e dar difusión a iniciativas relacionados coa fauna e flora mariñas de Galicia.

ESTACION HIDROBIOLOXICA "ENCORO DO CON"

LOCALIZACIÓN:
- Vilagarcía de Arousa: Castroagudín - Cea.

FINALIDADE:
A Estación é un centro de investigación científica especializado en hidrobioloxía que desenvolve asemade acción docentes e actividades de divulgación sobre bioloxía das augas continentais, facilitando aos investigadores as súas instalacións e medios para o desenvolvemento dos traballos científicos, proxectos de investigación, teses doutorais ou reunións científicas.

HERBARIO SANT

LOCALIZACIÓN:
- Santiago: Facultade de Farmacia. Avenida de Vigo.

FINALIDADE:
O Herbario é un servizo de apoio á investigación dependente da Vicerreitoría de Investigación e Innovación. Trátase dunha colección científica en crecemento constante de espécimes vexetais desecados, etiquetados e tratados convenientemente para a súa preservación indefinida. Os seus obxectivos principais son os de reunir material científico representativo da diversidade vexetal, prioritariamente de Galicia e secundariamente doutros territorios ibéricos, continentais ou mundiais. Os labores de investigación comprenden dende a recolección de mostras vexetais completas no campo, ata a súa catalogación e almacenamento seguindo unha ordenada sistemática botánica, pasando pola desecación, preservación, determinación, etiquetado e informatización de cada mostra. O Herbario está aberto á comunidade científica en xeral e entre as súas actividades, esporádicas, figuran colaboracións en actividades docentes de 2.º e 3.º ciclo. Ademais, pertence á Asociación de Herbarios Ibero-Macaronésicos (AHIM) e participou entre outros nos proxectos "Flora iberica" e "Global Plants". Os contidos das coleccións do herbario son accesibles en todo o mundo a través da Global Biodiversity Information Facility (GBIF) e tamén a través da propia web do servizo. As siglas SANT corresponden a súa matrícula internacional, coa que é recoñecido na comunidade botánica mundial.

HOSPITAL VETERINARIO UNIVERSITARIIO Rof CODINA

LOCALIZACIÓN:
- Lugo: Hospital veterinario. Estrada da Granxa.

FINALIDADE:
O Hospital Veterinario Universitario Rof Codina realiza un labor asistencial de alta calidade dirixida a veterinarios e propietarios de animais incorporando as máis recentes técnicas de diagnóstico por imaxe (TAC, gammagrafía, ecografía...) e variadas modalidades terapéuticas avanzadas e(tratamentos con radioisótopos, cirurxía láser, artroscopia, laparoscopia...). Ademais da actividade clínica, o Hospital Veterinario Universitario Rof Codina é unha instalación de soporte do labor investigador e docente ofrecendo formación práctica a alumnos da Facultade de Veterinaria, cursos de reciclaxe, actualización e especialización profesional dos posgraduados e profesionais do ámbito da saúde pública, ambiental e veterinaria.

LABORATORIO DE RADIOFISICA

LOCALIZACIÓN:
- Santiago: Estrada de San Lourenzo.

FINALIDADE:
O Laboratorio de Radiofísica é unha instalación de irradiación que presta servizos de apoio a iniciativas de I+D+i e de Transferencia Tecnolóxica relacionados coa detección e aplicacións da Radiación Ionizante. A plataforma dispón dun búnker de 60 m2 que acolle un irradiador gamma (Cobalto 60) e un Acelerador Linear. Ofrece a calquera usuario dos sectores público ou privado servizos de calibración, de irradiación e de radioterapia veterinaria.

UNIDADE DE MAGNETOSUSCEPTIBILIDADE

LOCALIZACIÓN:
- Santiago: Edificio CACTUS. Rúa de Constantino Candeira.

FINALIDADE:
Unidade especializada na realización de análises de magnetización e susceptibilidade de pequenas mostras experimentais sobre un amplo rango de temperaturas e campos magnéticos.

MUSEO DE HISTORIA NATURAL

LOCALIZACIÓN:
- Santiago: Museo de Historia Natural: Parque de Vista Alegre.

FINALIDADE:
O Museo de Historial Natural agrúpanse en torno aos conceptos de Biodiversidade, Biodiversidade Terrestre, Xeodiversidade e Solo, e Biodiversidade Mariña que permite un percorrido por ecosistemas de augas continentais e bosques galegos ou pola xeodiversidade. As coleccións deste museo foron conformándose desde mediados do século XIX, maioritariamente con aportacións de profesores da Universidade de Santiago de Compostela, de científicos e naturalistas, así como de particulares e institucións.

MUSEO UNIVERSITARIO A DOMUS DO MITREO

LOCALIZACIÓN:
- Lugo: Museo. Praza Pio XII.

FINALIDADE:
O Museo Universitario A Domus do Mitreo é un centro museístico xestionado pola Universidade de Santiago de Compostela (USC) situado nun edificio que alberga a sede do Vicerreitorado do Campus de Lugo. No seu solar apareceron os restos dunha domus que, durante o Baixo Imperio romano, foi parcialmente reformada para construír un edificio privado destinado ao seu uso como mitreo. O Museo expón nas súas instalacións unha selección de pezas cerámicas, de vidro e metálicas que foron atopadas nas escavacións arqueolóxicas do solar, principalmente de época romana, aínda que tamén se acharon restos materiais de época medieval e moderna.

OBSERVATORIO ASTRONOMICO "Ramón María Aller"

LOCALIZACIÓN:
- Santiago: Observatorio. Avenida das Ciencias.

FINALIDADE:
Fundado en 1943 polo profesor Ramón María Aller Ulloa, como continuación do observatorio particular que tiña en Lalín. As súas principais funcións son a investigación (en distintas liñas pero especialmente en estrelas binarias e múltiples), a docencia (acolle as prácticas do alumnado que cursa materias de astronomía), divulgación astronómica (organizando e desenvolvendo numerosos programas), e meteoroloxía (ten a serie viva de datos mais antiga de Santiago de Compostela, e é dende 1982 centro colaborador da Aemet). Dispón de instrumentación astronómica moderna de calidade e a súa biblioteca é unha das mais completas no ámbito universitario.

OFICINA NEXTGENERATION

LOCALIZACIÓN:
- Santiago: · Edificio CACTUS. Rúa Constantino Candeira. · Casa da Balconada. Rúa Nova.

FINALIDADE:
A Oficina NextGeneration é a encargada de centralizar e xestionar a información e a execución de axudas e subvencións que procedan do Mecanismo de Recuperación e Resiliencia (MRR) así como de impulsar as accións que sexan necesarias para axilizar a absorción e execución dos fondos europeos. Para poder levar a cabo esta encomenda, busca automatizar os procesos de traspaso bidireccional da información económica desde os sistemas da USC aos sistemas estatais, para facer ese traballo de xeito áxil, eficiente e seguro. Tamén porporciona asesoramento ás estruturas e persoal investigador para a percepción de axudas financiadas con MRR, así como do estudo previo da súa viabilidade e o control da súa tramitación. A Oficina NextGeneration depende da Xerencia, coordinada dende a Vicexerencia Xeral Técnica, as direccións das Áreas de Xestión da Investigación, Economía e Promoción e Estratexia Científica, e a xefatura da Subárea Económica, para os efectos de organizar e dirixir as súas actuacións.

SERVIZO DE DOAZON DE CORPOS

LOCALIZACIÓN:
- Santiago: Departamento de Ciencias Morfolóxicas. Facultade de Medicina e Odontoloxía. Rúa de San Francisco.

FINALIDADE:
O Servizo de Doazón de Corpos da USC, adscrito ao Departamento de Ciencias Morfolóxicas e integrado na área de coñecemento de Anatomía e Embrioloxía Humana, executa unha labor fundamental, a xestión integral dos procesos relacionados coas doazóns de corpos realizadas á USC para docencia e investigación. A doazón do corpo ao servizo da docencia e da investigación é un acto persoal, voluntario e solidario de enorme xenerosidade e altruísmo, pero tamén supón unha contribución de valor incalculable ao avance da ciencia e mellora da formación dos profesionais das ciencias da saúde.

SERVIZO DE MEDIOS AUDIOVISUAIS (SERVIMAV)

LOCALIZACIÓN:
- Santiago: Facultade de Ciencias da comunicación. Avenida de Castelao.

FINALIDADE:
A misión do Servizo de Medios Audiovisuais (SERVIMAV) é potenciar o uso de novas tecnoloxías audiovisuais na docencia e na investigación e incentivar a produción e difusión de vídeos educativos, culturais e divulgativos na USC. Asemade, o SERVIMAV ocúpase do arquivo e custodia dos fondos audiovisuais da Universidade e a súa publicación a través das canles USC TV e Youtube USC. O seu catálogo de servizos inclúe a gravación e retransmisión, a través da canle Youtube USC, de eventos da Universidade; a creación de produtos audiovisuais para departamentos, grupos de investigación, facultades etc.; a colaboración co Centro de Tecnoloxías da Aprendizaxe (CeTA) dando soporte aos procesos de calidade da ensinanza e promovendo o desenvolvemento de proxectos audiovisuais. Ademais, asesora á Universidade na adquisición e utilización de novos equipamentos.

SERVIZO DE OPTOMETRIA

LOCALIZACIÓN:
- Santiago: Facultade de Optica e Optometría. Edificio Monte da Condesa.

FINALIDADE:
O Servizo de Optometría cumpre funcións clínicas e educativas enfocadas na xeración e difusión de coñecemento no ámbito da optometría como son: formar profesionais en atención primaria visual nos niveis de promoción, prevención, diagnóstico, tratamento, rehabilitación e investigación científica e tecnolóxica; proporcionar á Facultade de Óptica e Optometría soporte clínico e investigador; e brindar asistencia primaria visual de alta eficiencia e calidade.

SERVIZO DE PUBLICACIONS E INTERCAMBIO CIENTIFICO

LOCALIZACIÓN:
- Santiago: Casa Gradin. Campus Vida.

FINALIDADE:
O Servizo de Publicacións e Intercambio Científico (SPIC) edita, distribúe e intercambia libros, monografías e teses de doutoramento que son resultado da investigación dos profesores e investigadores da USC, así como revistas científicas de diferentes áreas de coñecemento. As decisións en materia de edición e política editorial son adoptadas pola Comisión Editorial Académica, formada por dez membros pertencentes ás cinco grandes áreas do coñecemento. O SPIC concede prioridade ás obras orixinais de profesores e investigadores da USC, aínda que pode acoller tamén a edición de obras de investigadores externos.

SERVIZO TECNICO DE INSTRUMENTACION CIENTIFICA

LOCALIZACIÓN:
- Santiago: DME S.L. Estrada de San Lourenzo - Vidán.

FINALIDADE:
O Servizo Técnico depende da Vicerreitoría de Investigación e Innovación e ocúpase do mantemento e a reparación dos equipos de investigación da Universidade de Santiago de Compostela. Este servizo adxudícase cada 4 anos, mediante concurso público, e atópase na actualidade encargado á empresa DME, S.A. (correo electrónico: instrumentacion.usc@deyman.com) A Vicerreitoría financia o importe das reparacións, en tanto que os grupos de investigación abonan o custo dos materiais empregados nesas reparacións. Trimestralmente o Vicerreitoría impútalle aos Departamentos ou Institutos Universitarios o custo deses materiais. As solicitudes de reparación faranse mediante formulario web. Os grupos de investigación poderán consultar o estado dos seus equipos, para iso terán que darse de alta cumplimentando o pertinente formulario. Unha vez cumplimentado o formulario poderán facerse consultas a través do formulario de consultas.

SERVIZO DE ARQUEOMETRIA E CARACTERIZACION DE MATERIAIS

LOCALIZACIÓN:
- Santiago: Edificio CACTUS. Rúa Constantino Candeira.

FINALIDADE:
A Unidade de Arqueometría e de Caracterización de Materiais realiza estudos de obxectos arqueolóxicos, bens culturais, minerais e doutras mostras naturais e de carácter tecnolóxico e industrial a través de técnicas de análise elemental (CHNS, XRF), tomográfía de raios X, petrografía microscópica e imaxe científica (radiografía, fotografía 3D e fotografía hiperespectral).

UNIDADE DE ESPECTROMETRIA DE MASAS E PROTEOMICA

LOCALIZACIÓN:
- Santiago: Edificio CACTUS. Rúa Constantino Candeira.

FINALIDADE:
A Unidade dá soporte para a realización de análises de espectrometría de masas e proteómica para obter información relativa á masa molecular ou información estrutural dun composto orgánico, inorgánico ou biolóxico mediante un amplo abano de técnicas (Impacto electrónico, Ionización química, Maldi, Electrospray, Ionización química a presión atmosférica...).

UNIDADE DE IR-Raman

LOCALIZACIÓN:
- Santiago: Edificio CACTUS. Rúa Constantino Candeira.

FINALIDADE:
A unidade realiza análise de epectroscopias infravermellas e Raman para achegar información sobre as propiedades internas dun elemento (composición química, impurezas, interacción entre substituíntes, análises de grupos funcionais etc.) que teñen múltiples aplicacións (análise de polímeros e aditivos, estudos forenses, identificación de contaminantes ambientais ou de pigmentos...).

UNIDADE DE MICROSCOPIA ELECTRONICA E CONFOCAL E DE APOIO AS ESPECIALIDADES BIOLOXICAS

LOCALIZACIÓN:
- Santiago: Edificio CACTUS. Rúa Constantino Candeira. - Lugo: Edificio CACTUS. Campus de Lugo.

FINALIDADE:
A Unidade ofrece aos investigadores da USC, e mais aos de centros de investigación públicos ou privados, un conxunto de prestacións técnicas e asesoramento para a observación das mostras nos microscopios electrónicos e confocal e prestacións de apoio ás especialidades biolóxicas.

UNIDADE DE RAIOS X

LOCALIZACIÓN:
- Santiago: Edificio CACTUS. Rúa Constantino Candeira.

FINALIDADE:
A Unidade de Raios X está dedicada ao estudo dos sistemas estruturados con periodicidades de curto ata longo alcance (0.5-1000 Angstroms). Disponse de capacidade experimental para realizar estudos de monocristal (determinación da estrutura cristalina e molecular), po cristalino (análises de fases, alta resolución, cristalinidade), dispersión e difracción a baixo e medio ángulo (SAXS e WAXS), reflectometría (XRR).

UNIDADE DE RESONANCIA MAGNETICA

LOCALIZACIÓN:
- Santiago: Edificio CACTUS. Rúa Constantino Candeira. - Lugo: Edificio CACTUS. Campus de Lugo.

FINALIDADE:
A unidade ofrece servizos de apoio á investigación nas tres variantes da espectroscopía de Resonancia Magnética: a Resonancia Magnética Nuclear (RMN), a Resonancia Paramagnética Electrónica (EPR) e Imaxe de Resonancia Magnética (MRI) que permiten análises para achegar resultados cuantitativos de estruturas químicas, dinámica e interaccións moleculares, e imaxe molecular de mostras de orixe moi diversa.

UNIDADE DE SOPRADO DE VIDRO E CUARZO

LOCALIZACIÓN:
- Santiago: Almacén de mantemento. Estrada de San Lourenzo.

FINALIDADE:
Servizos de asesoramento, deseño, fabricación e reparación tanto pezas estándares como pezas de novo formato ata 11 cm de diámetro con fins docentes e investigadores, non estando contemplado a fabricación de vidro aforado nin a reparación de elementos aforados en partes calibradas. Préstanse servizos de soporte a unha ampla gama de liñas de investigación das Facultades de Bioloxía, Farmacia, Física, Medicina, Químicas e Veterinaria, CSIC, FEDER, Instituto de Cerámica, así como a diversas necesidades docentes.

UNIDADE DE TABAQUISMO E TRASTORNOS ADICTIVOS

LOCALIZACIÓN:
- Santiago: Facultade de Psicoloxía. Rúa Xose María Suarez Nuñez.

FINALIDADE:
A Unidade de Tabaquismo e Trastornos Adictivos presta asistencia cognitiva-condutual no ámbito das adiccións (tabaco, xogo patolóxico, cannabis, cocaína...) e a comorbilidade asociada a estes trastornos (depresión, ansiedade...). Asemade, proporciona soporte asistencial e de formación profesional e desenvolve programas de investigación para a mellora dos tratamentos e intervencións psicolóxicas no eido das adiccións.